"Бекажон" газетасининг 01.08.2019 йилги №61-сони


   

     Эндигина 2-босқич талабаси бўлиш арафасида бўлишига қарамасдан бир нечта фильм ва сериалларда бош қаҳрамон роллари билан халқимизга танилган, хусусан ойнаи жаҳон орқали юртимиз ва Қозоғистонда намойиш этилаётган "Ожиза" сериалининг бош қаҳрамони - Хадича ролининг ижрочиси, актриса - Райҳон Асадова бугунги меҳмонимиз.

- Райҳон, “Ожиза” телесериалида бош қаҳрамон ролидан ташқари илгари яна қайси фильмларда суратга тушгансиз? Дебют ролингиз қайси фильмда бўлган?

- Дебют ролим - Зулфиқор Мусоқовнинг “Берлин Оққўрғон” фильми.  Унда бош қаҳрамон Гулзода образида ўйнаганман.

- Илк фильмдаги ролингизда-ёқ бош қаҳрамонни ўйнаганмисиз?

-Ҳа.

- Кастинг асосида қатнашдингизми ёки кимдир таклиф қилганмиди Сизни бу рольга.

- “Берлин Оққўрғон” фильмида суратга олиш жараёнларига боришимдан аввал фильм ҳақида интернет сайтлар орқали кастинг эълон қилинганини кўрдим ва қизиқиб кастингда иштирок этганман. Бунда ҳеч қанақа макияжсиз бўлган расмларни олиб келиш талаби қўйилганди. Мен пардозсиз, табиий ҳолатдаги юз қиёфамда тушган суратларимни тақдим қилганман. Орадан 6-7 ой ўтганидан кейин мени чақиришган. Кастингдан муваффаққиятли ўтганимдан сўнг Зулфиқор Мусоқов: “Худо хоҳласа, сен Нигора Каримбоеванинг қизи, яъни халқ душманининг қизи Гулшода образини яратиб берасан”, - деб менга масъулиятли вазифани ишониб топширган.

- Асли қаерликсиз?

- Навоий вилоятида туғилганман.

- Ота-онангиз санъатга алоқадор кишиларми? Билишимизча ўқийдиган соҳангиз санъат соҳасига боғлиқ эмас экан. Қандай қилиб санъатга қизиқиб қолдингиз?

- Санъатга болалигимдан қизиққанман. Бироқ, келгусида айнан актриса бўламан, деб ўйламаганман. Мусиқа, рассомчилик, шунга ўхшаш санъат турларига қизиқардим.  Бундан ташқари мактабда ўқиб юрган кезларимда шеърлар ҳам ёзиб турардим.

Кейинчалик киноларни кўриб, ўзим яхши кўрган актрисаларнинг ролларини кўриб, фильм қаҳрамонларига тақлид қила бошлаганман.  Кино соҳасидаги фаолиятим, бу ҳаётимдаги чиройли бир тасодифлардан бири. Инсон астойдил ниманидир ният қилса, орзуси амалга ошаркан.

- Оила аъзоларингизнинг бунга муносабатлари қанақа бўлди?

-Ота-онам аслида тадбиркорлик, айнан хусусий тижорат билан шуғулланишади. Мени илк бор кинога таклиф қилишганда ота-онам дастлаб эътироз билдиришган. “Сен актриса бўла олмайсан, керак емас. Актрисалик вақтинчалик бўлиб қолиши мумкин. қайсидир муддатда суратга олиш ишлари бўлса, оралиқ вақт ичида бекор бўлиб, вақтинг зоъе кетиши мумкин.  Ундан кўра давлат ишида ишлаганинг маъқул”, - дейишган.

Ота-онам бу кино соҳасидаги рақобатлар, ўзлигимни намоён қила олмаслигимни ҳам ўйлаб менинг келажагимдан хавотир олишган. Аммо кино соҳасидаги муваффақиятларга эришаётганимни кўришгач, интилишим, ҳоҳишим борлигини кўриб, рухсат беришди. Бироқ бир шарт қўйишди: “Фақат биз  айтган институтга ҳужжат топширасан, агар ўз кучинг билан кира олсанг, санъат соҳасида ўзингни синаб кўришинг учун сенга рухсат берамиз”, - дейишди. Ота-онамнинг хоҳиш-истакларини қондириш учун, ўша универститетга ўқишга кириш учун  астойдил ҳаракат қилдим ва ўқишга киришга муваффақ бўлдим. Ота-онамнинг ишончини оқлагач, санъат соҳасига йўл олганман. Ҳозирда 2-курсга ўтиш арафасидаман.

-Оилада нечта фарзандсизлар?

- Тўртта фарзандмиз. Мен энг катта фарзандман. Мендан кейин иккита синглим, битта укам бор. Улар мактаб, лицей, коллеж ўқувчилари.

- Ҳозирда “Ожиза” сериали Қозоғистонда ҳам намойиш қилинаётган экан. Мазкур сериалга сизни ким таклиф қилди ёки сериалга ҳам кастинг асосида қатнашдингизми?

- “Ожиза” сериали учун кастинг эълон қилингани ҳақида менга яқин  бўлиб қолган пардозчи опамдан эшитдим.  У менга телефон қилиб: “шу қаҳрамон образига синовдан ўтиш учун келиб кета оласизми?” – деган. Келганимда режиссёр, продюссерлар  мени қарши олишган.  Дастлаб бошидаги иккита сериянинг сценарийсини беришди. “Ўқиб чиқиб, ўзингизда қаҳрамонлик тасаввурини ҳосил қилинг” деб топшириқ беришди. Сценарийни ўқиб чиққанман. Ёшлигига қарамасдан, жуда ҳам  иродаси кучли, бошидан кўп қийинчиликларни бошидан кечирган, айрилиқ, ёлғонлар гирдобида қолган, 20 ёшли қиз образини тасвирлашим керак эди. Мен ҳали бунақа  образларни ижро этмаганим сабабли, бошида бироз қўрққаним рост. Бу рольга профессионаллар чиқиши керак деб ўйлаганман.  Ўшанда куюнчак ва меҳрибон режиссёримиз – Дилшода: “Хадича ролини айнан сизда кўрдим,  кўзлари, сочлари, қошлари, ҳаммаси сизда мужассам.  Агар сиз чиқариб беришда қийналаётган бўлсангиз, асло ҳавотир олманг. Ўзим сизга астойдил ёрдам бераман”, деб мени тўлақонли ишонтиргач, ўзимга нисбатан ишонч пайдо бўлди ва ўша қаҳрамон қизнинг руҳий ҳолати, ички кечинмаларини юрак-юракдан ҳис этган ҳолда ролимни ижро этдим.  Бу сериалдаги ролим катта тажриба тўплашимга сабабчи бўлди.

- Баракалла. Иккала ролингизда ҳам бош қаҳрамоннинг ролини ўйнадингиз. Эпизод ролларингиз бўлмадими?

- Зулфиқор Мусоқов фильмларидан кейин Акбар Бектурдиевнинг «Тинчлик ортида» фильмларида ҳам рол ўйнаганман. Лекин эпизод ҳам эмас, бош роль

ҳам эмас. Нафиса исмли кичкина қиз ролини ижро этганман..

- Бу иккинчи ролингиз эдими?

-Ҳа иккинчи фильмим.

- “Ожиза” сериали нечанчи ролингиз?

- Тўртинчиси.

-Номларини айтиб, санаб ўтсангиз.

- «Берлин Оққўрғон»дан сўнг,  Йўлдош Мўминовнинг «Чегарадаги қишлоқ»              сериалида бош қаҳрамон Ойтўлди исмли қизнинг ролини ўйнаганман.

-Бунда ҳам бош ролни ўйнадингизми?

- Ҳа.

 - Сиз клипларда ҳам суратга тушаётган экансиз.

-Тўғри.

- Ёш бўлишингизга қарамасдан катта муваффаққиятларга эришибсиз. Кўп актрисалар ҳатто ўқишни битириб ҳам, бирданига бош ролга эга бўла олишмайди. Сизда эса кетма-кет бош роллар. Бундан биз хурсандмиз. Қиз бола машҳур бўлгани сари келадиган совчилар сони янада ортади.  Уйдагиларингиз ўқишни тугатсин, дейишаётгандир. Ўқиш жойингизда ҳам талаба ва ўқитувчиларнинг Сизга бўлган муносабатлари ўзгаргандир. Таниқли бўлганингиздан кейин ҳаётингизда нималар ўзгарди?

- Чиндан ҳам, ойнаи жаҳонда  кўрина бошлаганимдан кейин, курсдошларим менга бошқача, ҳурмат маъносида қарай бошлашди. Шахсий ҳаётга келадиган бўлсак, уйдагиларим менинг қароримни кутишаяпди. Турмуш қуришимга келсак, ҳали бери - 3-4 йил оралиғида бу нарсага чалғимайман ҳам, тўхталмайман ҳам деган мақсадни ўз олдимга қўйдим.  Ўқишимни тугатиб, дипломим эгаси бўлганимдан кейингина, ўйлаб кўраман. Ўзимни оила қуришга тўлиқ тайёр деб ҳисоблаганимдан сўнг мени тўла-тўкис тушунадиган умр йўлдошни танлайман.

- Диплом олсангиз, мутахассислигингиз бўйича ким бўлиб етишасиз?

-Мутахассислигим иқтисод, маркетинг, тижорат.

- Фильмларда суратга тушиш давомида тижорат билан ҳам шуғулланиб, ота-онангизнинг тадбиркорлик фаолиятини давом эттирмоқчимисиз?

- Одам ниманидир бажаришга чин юракдан киришса, ҳамма иш қўлидан келаркан. Худо хоҳласа,  ҳам санъат соҳасида, ҳам тижоратда фаолият юритишга ҳаракат қиламан.

- Менимча ҳам шуниси маъқул. Ўзингиз фильмлар олишингизга имкон пайдо бўлиб, четдан ҳомий излашга ҳам эҳтиёжингиз қолмайди.

- Мактаб саҳнасида Пиримқул Қодировнинг “Юлдузли тунлар” асарини саҳналаштиргандик. Мен Бобурнинг хотини ролини ўйнагандим.  Яқинда  Қўқонхон, Амир Умархон, Нодирабегим ҳақида Дилмурод Масаидовнинг “Қўқон шамоли” номли тарихий, бадиий фильм суратга олинди. Бу фильмда мен Нодирабегим ролини ижро этиш бахтига мушарраф бўлдим.

Ҳаққоний режиссёрларга тушганим ва ролларимнинг ҳаммасини давлат лойиҳаларидан бошлаганим чинакам бахтим бўлди!

- Башарти сценарий Сизга ёқса, хусусий фильмларда ҳам роль ўйнаш ниятингиз борми?

- Шу йил айнан шундай “Уйланишни хоҳламайман” деб номланган комедик фильмда суратга тушдим. Мирзабек Холмедов, Суръат Исломов, яна катта-катта актёрлар ўйнаган. Унда ҳам бош қаҳрамонни ўйнадим. Лекин бу фильмда ҳамманинг роли комедик образлар бўлса, меники ўқимишли, ақлли қиз роли. Сценарийц муаллифи - Суръат Исломов. Сентябр-Октябр ойларида премъераси бўлади. Суръат Исломовнинг комедик ролларини кўрганман.  Сценарийси менга ёққани учун ҳам, ўқиб кўриб рози бўлганман. Суръат Исломовнинг билан партнёр бўлиб ўйнаганман.

- Мухлисларингизга тилакларингиз? 

- Ҳаммага ҳамиша ижобий тилакларимни тилайман. Ҳар доим ҳавас қилиб яшаш керак! Ҳеч қачон ҳеч кимсага хасад қилманг. Яхшиликка, мўъжизаларга ишониб яшанглар. Яхшилик ва эзгу амаллар ҳамроҳингиз бўлсин. Атрофингизни фақат яхшиликлар, қалби чиройли, беғараз инсонлар билан қуршаб олинг. Шунда дунё ҳам кўзингизга гўзал бўлиб кўринади!

-Сизни ҳам ютуқларингиз бардавом бўлсин. Юксак марраларга эришинг!

 

Музаффар Муҳаммадназар суҳбатлашди.